Botnane gravrøyser

Om

På gardane Sørbotten, Øvrebotten og Nordbotten i Botnane ligg åtte gravrøyser, fleire lett synlege frå både vegen og skipsleia. Gravene er sannsynlegvis frå eldre bronsealder - kring 1800 - 1000 f. Kr. Desse kystrøysene er mellom dei fremste kulturminna frå bronsealderen som er bevart i Noreg, i god stand etter meir enn tre tusen år. Den største har eit tverrmål på 36 meter, den minste er på 14 meter. Når så mykje arbeidskraft kunne brukast på å bygge gravmæle over få utvalde personar, tyder det på at samfunnet var stramt hierarkisk ordna.

Ta av frå riksveg 614 ved krysset på Myklebust. Følg fylkesvegen til Botnane ca 30 km. "Nordre Røysa" ligg nedfor vegen på høgre sida. "Søre Røysa" ligg på venstre side av vegen litt nærare gardane i Nordbotten. Dei andre røysene ligg på Sørbotten på sørsida av Pollen.